赌波嘅嘢变化万千，有时表面睇係「强队对鱼腩」，但实质上係「冇牙老虎遇猪头骨」，劲旅分分钟赢波输盘，自己攞晒3分就唔益上盘客!世界盃欧洲区外围赛听日凌晨激战连场，其中英格兰、意大利同德国，都分别有主力因伤或停赛缺阵，面对弱旅，究竟用咩投注策略?等我哋话畀你听!

　　进攻铁三角停赛 意大利细打保

　　欧洲区B组意大利主场对保加利亚，意军进攻「铁三角」巴洛迪利、奥斯华度、蒙杜利禾一齐停赛，领队柏兰迪利准备改用4321阵式，派老将基拿甸奴打单前锋，攻力大打折扣。其实意军只要今仗榜首之战唔输，仍可保持出线优势，加上连踢两轮外围赛，首场唔可以搏得太尽。保加利亚作客遇劲旅，但求不败已收货，预料会形成拉锯局面，捧入球细。

　　(now 633及660周六凌晨2时45分直播)

　　意大利外围赛6战攻入12球，其中7球由巴洛迪利、奥斯华度、蒙杜利禾包办，三人坐波监，影响有几大可想而知，尤其缺少「巴神」，进攻冇晒睇头。柏兰迪利计划用基拿甸奴打单前锋，以基亚卓尼利及简达华侧击辅助，难予人信心，加上意大利下周中会迎战同组另一支争出线劲敌捷克，今仗唔可以去得太尽，领先后肯定拉布保胜果。

　　保加利亚Hea碧退役缺攻力

　　保加利亚自从贝碧托夫退出国家队后，缺乏一位领军人物，阵中大部分球员効力本土球会，外流球员中，以阿士东维拉中场阿历山大当尼夫、燕豪芬中场曼奴列夫比较有睇头，后者曾喺首循环射破意军大门，但今次去到意大利，会受到严密看管，恐难再偷鸡。