波历克告别 队长拿姆百战

　　C组榜首战，德国喺拜仁嘅安联球场迎战奥地利，德军今仗赛前会为前队长波历克举行告别国家队仪式，同时亦係现任队长拿姆第100次代表国家队，战意鲜明，面对熟晒路又同属攻强守弱嘅奥地利，入球大细调整到3.5球，黑柴照撑大盘。

　　(now 632周六凌晨2时45分直播)

　　小猪葛斯因伤缺阵

　　德国目前领先次席嘅奥地利5分，只要今场同4日后作客法罗群岛赢波，就可以提早出线决赛周，虽然今仗唔齐脚，「小猪」舒韦恩史迪加、马里奥葛斯、根度简同普多斯基都因伤缺阵，不过两名箭头高路斯同马里奥高美斯近期喺意甲都有货交，今季改投慕逊加柏嘅麦斯古斯进步神速，前线火力强大，中场更人才济济，汤马士梅拿、奥斯尔、马高列奥斯、却奥斯、达斯拿、舒贺尔尼同今季突飞勐进嘅悉尼森姆都极具创造性，足以对前线提供强力支援。

　　不过，德军防线好唔稳阵，近3场热身赛面对厄瓜多尔、美国同巴拉圭，合共竟然丧失9球，防线大将晓姆斯唔弗，球队过去10次对奥地利有8次开大，德军近两次主场对奥地利都开出6比2呢个疯狂波胆，证明双方熟晒路唔使试探，一埋牙就会搏槌。

　　奥地利阵中除有7名球员効力德甲同德乙外，连艾云舒捷斯同阿拿奥杜域上季都仲喺德甲効力，拜仁小将阿拉巴近三场外围赛都入到波，球队近3次对德军亦有波入，今场作客唔会龟缩，两军好有机会再演入球骚。