嚟紧因为进行世界盃外围赛嘅关係，各大欧洲足球联赛都要让路。好多香港球迷关心嘅英格兰，先于周五深夜喺温布莱出战摩尔多瓦，然后下周二深夜则作客乌克兰。

　　英格兰首轮作客已经以5比0大炒摩尔多瓦，今仗主场出击可谓十拿九稳，下星期作客乌克兰先至係英军能否出线明年巴西世界盃嘅关键一战。依家英格兰喺H组落后黑山2分但少踢1场;而乌克兰又以1分落后英格兰。换言之假如英格兰作客乌克兰全失3分，就好大机畀乌克兰爬头。英格兰到时除咗要赢晒馀下赛事外，仲要寄望黑山同乌克兰双双失分才能出线，因此英格兰唔想喺最后关头嘅命运畀人哋控制，作客乌克兰一仗绝对唔可以输。

　　不过，令英格兰领队鹤臣最为头痛嘅係，射手朗尼因头部受伤将会缺阵。论近况同脚风，史杜列治肯定係最佳嘅替补人选，但佢喺国家队层面上唔係有太多经验。考虑到呢场比赛不容有失，一向以保守见称嘅鹤臣可能会起用经验较丰富嘅韦碧克作单箭头，配合5名中场球员，实行以唔输为大前提。

　　(now 621周六凌晨3时直播英格兰对摩尔多瓦)

　　德国保「首」出线冇难度

　　另一支获好多球迷支持嘅德国，出线形势就比英格兰明朗得多。德国依家喺小组有5分嘅领先空间，只要能够喺奥地利同法罗群岛身上全取6分，基本上已经稳获首名出线资格。

　　(now 632周六凌晨2时45分直播)