阿根廷、哥伦比亚只要双双和波，就可以率先抢到2014世界盃决赛周嘅入场券，但两军人强马壮，又点会咁衰仔计到尽求和!世界盃南美区外围赛进入白热化阶段，阿根廷召入美斯帮手「扑飞」，去到巴拉圭地头肯定劲开火;哥伦比亚、乌拉圭两雄相遇又必有恶斗，等睇入球骚啦!

　　阿根廷有美斯、阿古路、迪马利亚助阵，不嬲以攻代守，攻力有几强唔使介绍;最过瘾係巴拉圭都火力全开，老将辛达告鲁斯弗到爆炸，为保「世盃梦」，主场出击唔怕同「蓝白兵团」驳火，今场咪理边个赢，捧大最好!

　　(周三早上9时40分开赛、马会网上文字直播)

　　睇番今次南美洲区形势，因为巴西係主办国唔使打外围赛，阿根廷可谓鹤立鸡群，目前高踞榜首係意料之内，哥伦比亚紧随其后，双方现时均有26分，只要哥伦比亚于较早时间开波嘅赛事唔输畀乌拉圭，阿根廷作客巴拉圭唔使赢都力足出线。事实上，「蓝白兵团」成功进军巴西只係时间问题，之前2场外围赛，球队有美斯缺阵下和晒，今轮领队沙贝拉见希古恩停赛，就召入美斯压阵，再加埋阿古路、拿维斯同柏拉斯奥，可轻易撕破主队防线。不过，球队中、后防大将马斯真兰奴同加雷亦要坐波监，防守力比平时更信唔过，想保持清白之身，坚难。

　　巴拉圭出局边缘冇保留

　　连续4次杀入世盃决赛周后，巴拉圭今次出闸脱脚，连炒2个领队后搵得域陀真尼斯掌舵，上仗虽大炒玻利维亚，但仲係排紧尾二。计番条数，巴拉圭今场赢波，仲有极微机会抢到第5名踢附加赛，冇理由唔搏埋佢，加上近2战球队轰入7球，强如德国都要失3粒畀佢哋，捧大啦!