4大射手搏拳斗数胡

　　南美洲区外围赛头4名可以直接闯入决赛周，第5位嘅乌拉圭落后榜首双雄阿根廷同哥伦比亚7分，球队只剩3场赛事，今仗失分就会直接「保送」两军入决赛周，自己机会又细咗，梗係唔会畀机会对手，相反哥伦比亚赢波就可以book定酒店同机票，球队多外流欧洲球员，为避免漫漫球季仲要兼顾国家队赛事踢到残，佢哋都想赢波速战速决，今仗搏拳味浓，一于捧大。

　　(周三早上6时开赛)

　　阿苏卡云尼火併法卡奥洛迪古斯

　　当然，要赢波，都要有好球员识入波先得o架，咁呢层相信大家同渡边年一样都唔会点担心，两军中前场球员粒粒巨星，球迷都可以啷啷上口，乌拉圭「哨牙苏」苏牙雷斯刚战秘鲁入两粒状态勇，仲有卡云尼同科兰等侵略性及经验俱备嘅球员，加上主场出击，同埋形势上失分就拱手相让个决赛周席位畀对手嘅心态，肯定攻到晕。

　　至于哥伦比亚大军亦有摩纳哥双星法卡奥同占士洛迪古斯，同样係把握力极好嘅球员，虽然和波都可以出线，但球队唔习惯踢守势波，而且南美球员对国家队赛事好重视，荣辱感好强，所以有得落场一定搏命，加上今场唔早啲攞到入场券，馀下两仗要对厄瓜多尔同阿根廷，抢分唔易，仲会令阵中効力欧洲球会嘅球员疲于奔命，稳阵啲今仗搞掂佢就瞓得安乐，相信作客都会同乌拉圭斗攻，今仗入波唔会少。