D组赛事，荷兰上一轮意外在爱沙尼亚身上失掉两分，但对出线前途影响不大，事关只要佢哋今晚作客击败鱼腩安道尔，同时间罗马尼亚未能击败土耳其，橙色军团便可稳夺小组首名直接出线资格。基于两军实力差距太大，波童认为荷兰可以早早领先奠定胜局，首选「半场大」。

　　(周三凌晨2时30分开赛)

　　相信上仗赛前冇咩球迷估到荷兰作客爱沙比亚，要靠尹佩斯补时阶段嘅12码先至逼和对手2比2抢番一分，其实荷兰球员喺早段先开纪录后，心态上确有少许放鬆，所以先畀到对手机会偷鸡。安道尔今届外围赛7战全败，得0球而失22球，反扑力难同爱沙尼亚相比，荷兰球员吸取上仗教训，一定想尽快入多几粒，留番啖气周末返联赛搏杀，上半场赢两球唔难。

　　罗马尼亚或送橙军一程

　　荷兰攞3分冇问题，但能否提早订机票去巴西仲要睇罗马尼亚对土耳其嘅战果。罗国落后荷兰6分，只领先土耳其3分，赢波嘅话数字上仲有机会做最终一哥，输波唔只冇机会直接出线，仲可能被紧随其后嘅匈牙利或土耳其赶过，因此应以稳为先，形势上唔使急攻，所以有机会造就荷兰提早出线。