世界盃外围赛欧洲区H组今轮上演前列「关键六分波」，乌克兰主场决战英格兰，英军赛前大闹前锋荒，大可以龟缩以一分为目标，话唔定更有利发挥。乌军上场狂数鱼腩圣马力诺不足为据，呢班波欠缺强攻本钱，相信今战士哥唔多，苏豪推介细盘!

　　(now 621周三凌晨2时45分直播)

　　英格兰阵营连番传出坏消息，曼联前锋朗尼整亲个头缺阵，利物浦当弗射手史杜列治又伤，加上「红魔鬼」箭头韦碧克要坐波监，而迪科尔喺热刺坐冷板坐到硬晒軚，佢哋喺今场大战要靠修咸顿前锋列基林拔攻坚，听落都觉得几可悲。

　　不过，英军中后场根基稳固，中场有「双特」谢拉特同林柏特撑住，仲有韦舒亚帮手，据悉主帅鹤臣想搵埋曼城中场占士米拿顶韦碧克个位，此举可进一步加强防守力，作客专心搞破坏打突击，绝对係佢哋嘅强项。

　　近3对赛全细

　　另一边厢乌克兰上场以狂风扫落叶姿态9比0狂数圣马力诺，近四战不败兼保持不失，攻守发挥都好。无可否认，乌克兰上年年尾改由新帅费文高带队后重拾朝气，新一代重心球员耶莫兰高及高路比恩卡亦渐见大将之风，不过大家要留意一点，佢哋近期嘅对手只係黑山及以色列之流，英格兰烂船尚有三斤钉，即使残阵出战但级数唔会差得去边，绝不容许乌军为所欲为。翻查往绩，两军对上三次碰头录得胜和负各一，三场都係开细盘，今战相信唔会例外。