嚟咗日本拍《快乐地球》呢几日，其中令我最难忘嘅，就係我以一个女僕造型去秋叶原拍摄时，突然杀出好多「御宅族」。唔係夸张，真係去到旺角西洋菜街都未有咁墟冚。但当我哋去到横滨时，情况又就完全唔同晒，有好多运动型身材嘅型男嘅呢。莫非日本男仔係会因应身处唔同地方，身材就有咁大分别嘅?

　　幼细脚法致胜关键

　　今日下昼日本国家队就会喺横滨迎战加纳(有线61及201台周二晚6时20分直播)，日本上星期轻轻鬆鬆大胜危地马拉，无论係地波短传、高空轰炸、冷箭远射样样齐，下半场换入本田圭佑、柿谷曜一朗后，全队更加认真，果然危地马拉完全唔够踢。呢场波对手虽然弱，但日本仍然认真对付，同埋表现出默契，令到今日对加纳呢场硬仗打咗支强心针。

　　无论係技术同身形，加纳当然比危地马拉高一班，但以日本上场嘅表现同状态，再加上主场之利当然有得打，况且加纳嘅正选门将阿当拿臣就已经因伤无随队，日本要入波就更加容易。加纳班球员所持嘅心态可能都係当呢场同一般「太公波」差唔多，未必好专注，相反呢班日本国脚无论係海外球星或者本土球员，普遍体能唔错，面对住大大份嘅加纳球员未必会好输蚀。我哋女仔当然最锺意男人细心啦，日本队幼细嘅脚法係致胜关键，呢个亦係我锺情日本队嘅地方。