炒完新加坡信心返晒嚟

　　英格兰世界盃出线形势一般，不但球迷关注佢哋嘅情况，连世界各地博彩公司都惊英军出局。英格兰向来係名气球队，喺大中华地区极受欢迎，佢哋缺席08年欧洲国家盃，投注额真係缩晒水。呢班波长期有捧场客，如果2014世界盃又冇份，对博彩界人士嚟讲绝对係灾难。

　　应以德国做榜样

　　今日同大家讲吓中国足球先，中国东北球员普遍神高神大，肥叔真係好唔明点解班领导之前搵个西班牙教头(甘马曹)带队，要佢哋打地波短传，班球员技术有限，盲目跟风打西班牙式足球，根本唔係嗰回事。若果真係要学一支欧洲国家队，国足应以德国为榜样，有时唔係话边队劲就跟边队，都要谂吓自己嘅特性，除非学晒人哋整个系统由青训做起啦，否则都係难有作为。

　　国足上场大炒新加坡，打出自「615中国足球惨桉」以来最漂亮嘅一场胜仗，甘马曹离开后打得简简单单仲实际，真係几讽刺!中国经过大败畀泰国一役后，领导层高度重视足球发展，富豪球会广州恒大亦全力配合，起码依家队内气氛好番好多，今次再喺主场迎战另一支东南亚球队马来西亚，国足瓣瓣都高过对手，好有机会再次大胜!

　　(周二晚7时35分开赛)