上星期转会市场终于结束，而我嘅爱队阿仙奴领队云格亦做咗场好戏，成功引入咗奥斯尔，我相信佢一定可以帮阿仙奴赢取冠军，胜利就由今周作客新特兰开始吧!

　　呢位德国中场好波唔在讲，佢喺场中带起成队波先至係最架势呀，大家见佢之前喺皇马嘅表现就知啦!依家过到嚟兵工厂，肯定帮到左右两边嘅辛迪卡索拉同禾确特，加上有法米尼打防中，奥斯尔就可以全力策动攻势，希望之前三场都有波入嘅中锋基奥特继续有神勇嘅表现啦!

　　(now 622周六晚10时直播)

　　「25球王」呼之欲出

　　其实讲起阿仙奴一直以来嘅转会问题，呢几年都成为笑柄，差不多每位离开阿仙奴嘅球员都即时夺冠，好似前季有拿斯尼喺曼城赢咗英超，法比仔亦为巴塞隆拿捧走西甲，甚至「神丹」丹尼逊返巴甲都有冠军落袋。

　　但咁多单转会中，最令厂迷有印象都要数到一位「25球王」，佢拎过足球先生，攞过英超金靴，更曾经被称为亨利嘅接班人，当年厂迷个个都咁锡佢，点知佢就为钱转会另一英超大会，激到阿仙奴迷扎扎跳，真係名副其实「二五仔」。

　　来紧「25球王」话自己会重拾射门鞋，要做番球会射手，但佢队波今年买人买到开巷，周六有冇得出场都未知，究竟呢位「25球王」係边个?星期五晚嘅《球分》节目入面大家记得留意喇!VT go!

　　(now 101周五晚10时30分直播)