射手哑火3仗入得1粒

　　经过连日来的世界盃外围赛后，今日焦点再次集中番各地联赛度，其中德乙阿伦主场对1860慕尼黑值得留意，虽然后者名气稍大，但射手拿奥夫近期演出哑火，表现飘忽不定，就算受让平半都咪掂，阿King宁愿捧番阿伦上盘。

　　(有线64及203台周六凌晨零时30分直播)

　　同市宿敌拜仁慕尼黑上季呼风唤雨，1860慕尼黑简直係蚊髀同牛髀，近年只能喺乙组浮浮沉沉，曾经同古兰尔齐名、被视为德国锋线新希望的拿奥夫，唔经唔觉都三十有二，但总算喺1860慕尼黑站稳阵脚，不过佢近期冇货交，导致球队进攻杂乱无章，犹如瘫痪，近三场入得一粒咁大把，仲要係对方的乌龙波，认真唔掂。虽然阿伦只係中游分子，但喺自己地头出战不乏佳作，曾经豪赠排第四嘅凯沙罗顿四蛋，证明佢哋已经重上正轨，走出开咧时的低谷，今返主场火併第六位嘅1860慕尼黑要让波，摆明有计，一于捧上盘。

　　多德勒支连捷再追

　　至于荷乙榜首多德勒支连战连捷，气势如虹，最重要係该队进攻点分布甚广，令对手防不胜防，今仗作客防线穿晒窿嘅靴蒙特，可乘势再下一城，客胜有2.35倍分头非常抵玩。(周六凌晨2时开赛)最后阿甲首贝格拉诺主场迎战沙士菲，前者于南球盃被沙士菲淘汰后逐渐回勇，况且沙士菲仍有南球盃后顾，今仗随时留力，贝格拉诺可望报番一箭之仇，平手盘梗係撑贝军喇。(周六早上7时15分开赛)