日职周五特别场由柏雷素尔主场对磐田山叶，柏军近期兼顾四条战线，型仔射手工藤壮人喺忙爆之际宣布婚讯，大军喜气冲天，将贯彻近期丧攻打法争胜。山叶搵嚟前大坂飞脚出击型左闸安田理大帮手护级，客场出战都会死攻，玩大盘最好!

　　(有线61及201台周五晚6时直播)

　　柏雷素尔近期成为全日职最忙嘅球队，除应付联赛外，仲要兼顾亚冠盃、天皇盃同联赛盃，四线作战认真夸张。佢哋嚟紧周中要喺亚冠盃远征作客沙特阿拉伯球队艾沙比，赛前队中主将工藤壮人宣布同女伴拉埋天窗，佢话本来自己嘅私事同球会冇乜关係，但依家做咗人老公后感到责任更大，会更落力作赛。自从于亚冠盃八强首回合赛和艾沙比后，柏军踢法更进取，对上五战全大，近两场盃赛同样入四球，火力好劲。

　　磐田要护级搵勐将抢分

　　磐田山叶位列尾二，比尾四球队甲府风林少九分，护级危急。会方四出搵救兵帮手，近期成功由荷甲球队维迪斯引入左闸安田理大，呢个前日本国脚出国前効力大坂飞脚嗰阵助攻超劲，家阵重返日职战场作赛，适应上唔成问题。山叶连续九场联赛赢唔到，表现真係麻麻，所以佢哋刚于盃赛对住业馀球队索克斯福井都强阵出击，最终成功以八比一狂炒对手，经过呢场大胜后，士气肯定好咗，今次对住柏雷素尔相信会斗攻全力抢分。

　　翻查往绩，磐田山叶近三次作客柏雷素尔赢晒，三场都係开大，今次两队再次碰头，预期都会大手交易，大盘係投注首选。