球坛话题人物加里夫巴利帮新东家皇家马德里宣传橙色嘅第二作客球衣，教练安察洛堤赛前话巴利今场一定会落场，不过未知正选或后备，有报道话佢会踢番出道个位，即係出击左闸，安察洛堤赛前就话佢会踢右边，不过寻日赛前操练，传媒影到C朗练波时对住巴利吓吓唔锡力剷落去，话冇心病都唔信，而巴利外父就爆料，话囡囡Emma将会带埋乖孙搬埋马德里陪巴利。

　　莎拉BB未知边度出世

　　另一边厢，坐冷板櫈嘅卡斯拿斯，其未婚妻莎拉腹大便便出席公开场合，佢话未知BB喺边度出世，暗示「圣卡斯」想走，莎拉又话个仔可能改名Lionel向美斯致敬。

　　睇住两单新闻，就知皇马更衣室几咁乱，加上佢哋不幸染上FIFA病毒，艾斯高、法比奥干查奥同马些路均带伤而回，就算出得亦唔慌弗，碰巧升班球队维拉利尔开咧连赢三场，墨西哥新援杜斯山度士入波助攻瓣瓣有，加上「银河舰队」有欧联作客加拉塔沙雷嘅后顾，面对如狼似虎嘅维拉利尔随时搁浅，斯维强捧有2.5倍嘅「让球主胜」。