青训学院坚 小兵个个醒

　　修咸顿盛产优质球星，被誉为英格兰球坛「星工厂」，代表人物包括今夏以天价加盟皇马嘅威尔斯球星加里夫巴利。「圣人」新季继续重用自家製小兵，年仅十八嘅左闸劳基梳尔更成多支大会目标，有条件成为「新巴利」。修咸顿大军活力十足，今轮主场迎击缺少前利物浦三宝嘅「锤仔帮」韦斯咸赢面高，主胜捧得过!

　　(now 621周日晚11时直播)

　　修咸顿叫得做「星工厂」，梗係出产过唔少勐人啦，英格兰传奇射手舒利亚都係出自佢哋嘅青训系统，当然唔少得英伦百年难得一见嘅天才中场拿铁斯啦。近年修咸顿青训学校毕业生都好勐料，除咗上面提过嘅加里夫巴利，仲有去咗阿仙奴嘅禾确特及阿历士张伯伦等英格兰国脚，连擅长搞青训嘅阿仙奴教头云格都大讚「圣人」青训学院好鬼坚。

　　劳基梳尔劲似巴利仔

　　「圣人」今夏使咗超过3,000万镑买入守将洛夫伦、中场云耶马及射手奥斯华度，但主帅普捷天奴并冇冷落班自家製小将，左闸劳基梳尔、右闸哥林张伯斯及中场禾特普斯全部十八岁、卜卜趣，劳基梳尔今夏先后同曼联及车路士传过绯闻，呢个左脚仔踢落有师兄加里夫巴利嘅影子，前景唔错。大军充满活力，仲有今期人气王英格兰中锋列基林拔，战斗力好劲。

　　韦斯咸缺前利物浦三宝

　　韦斯咸教头艾拿戴斯今夏购入利物浦双星安祖卡路尔及达宁，向来执惯烂铜烂铁嘅大Sam肯使1,500万镑签下卡路尔，全因上季试完觉得啱使，谂住搵佢做进攻重心，点知呢个大旧衰一伤再伤有排抖，搞到Sam哥方寸大乱。「锤仔帮」上场主场对史笃城一次中龙嘅射门都冇，今战三个利物浦旧将祖高尔、达宁同卡路尔继续休战，睇怕都係会乖乖放低三分。

　　领队Chit Chat

　　艾拿戴斯(韦斯咸)：所有上星期参加国际赛嘅球员都喺冇伤冇病嘅情况下顺利归队，球队依家非常专注今仗对修咸顿嘅赛事，我期望球员们可以喺今仗交出积极嘅表现。

　　普捷天奴(修咸顿)：韦斯咸喺过去3场证明係一支体力化球队，佢哋踢嘅係简单直接嘅足球。不过，我哋唔会因为咁而改变踢法，球员要依照既定嘅作战计划去应付对手。