多蒙特教头畀晒贴士

　　德甲巨人拜仁慕尼黑上季完成三冠霸业，不过讲到教头嘅风头就以近季带领多蒙特中兴嘅高普最劲，佢已经被钦点为未来德国国家队主帅嘅热门继任人，多蒙特会方仲破天荒公告天下，将来无论发生任何事，都永远唔会炒佢鱿鱼。

　　高普领军出色，喺收购球员方面亦做得好，引入咗多位勐将，包括破球会转会费纪录嘅「阿美尼亚施丹」米希达利恩、「德甲新飞人」奥巴美扬同「希腊第一中坚」柏柏斯达夫普路斯，扣除卖走「金童」马里奥葛斯所得收入，今夏只花咗五百几万欧元，球队实力有增无减，受到德国传媒大讚，不过佢话讲组军，多蒙特唔够慕逊加柏醒，仲预期慕逊加柏今季会取得重大成功添!

　　多蒙特同慕逊加柏同属德甲西部北威州，两会昔日都曾经係德甲巨人，球会名字前同样加有「Borussia」地名。黑柴年少时，无论睇杂志定电视，都记得当时慕逊加柏嘅香港译名就係「保路西亚」，足见两会之间恩怨情仇，高普大讚呢队死敌今季花少钱办大事，随时可以攞到下届欧联入场券喎!

　　作客「大」得起贺芬咸

　　慕逊加柏今夏先后以低价引入弗赖堡嘅德国国家队前锋新希望麦斯古斯，同埋基辅戴拿模嘅前哈化柏林巴西锋将拉菲尔基达奴，两人迅速融入球队，配合原有嘅一老一嫩技术球员艾兰高同靴尔文，组成威力惊人嘅「加柏四宝」，认真唔讲得笑。

　　今晚慕逊加柏作客面对防线严重缺态，仲有两名中场大将罗拔图法明奴同沙利荷域缺阵嘅贺芬咸，黑柴信高普眼光独到，强捧慕逊加柏平手盘同大盘。

　　(有线61及64台周日晚9时30分直播)