意甲早场费伦天拿主场斗卡利亚里，双方今季嘅表现都令Ali感到兴奋，费伦天拿至今保持两仗全胜，我认为係今季意甲三甲分子，不过防线漏洞多会成为争霸最大障碍，今仗主场出击赢面当然较高，但卡利亚里嘅反击亦非同小可，今场估计双方都会有波入，主胜赔率太低，Ali推介1.7倍大盘。

　　(周日晚6时30分开赛)

　　费伦天拿今季转会工作做得好，来自拜仁嘅德国箭头马里奥高美斯，同原有锋将基奥斯比罗斯一刚一柔配合得天衣无缝，至今两人合作喺两场联赛已合共轰入五球，认真犀利，佢哋喺国际赛休战期前作客以5比2大破热拿亚，全场攻势此起彼落，令观众睇到一场赏心悦目嘅比赛。马里奥高美斯喺国际赛期间喺德国队坐足两场冷板櫈，谷埋一肚火要搵人发洩，整定作客嘅卡利亚里唔好彩。不过即使球队成绩同表现都好，教练蒙迪拿仍然为防线头痛，佢哋今季喺意甲同欧霸场场失波，今场两名主力二闸古达度同柏斯哥双双因伤缺阵，防线继续唔稳阵。

　　卡利亚里反击够效率

　　卡利亚里唔係劲旅，但杀着係快速反击威力强横，失惊无神就打你一拳，令好多强队都防不胜防，上仗佢作客顶唔住AC米兰嘅超强火力好正常，但除咗由马高沙奥入波外，仲製造咗唔少具威胁埋门机会，今场作客遇上主攻嘅劲敌，快速反击又可以大派用场，既然两军今季联赛至今全开大盘，今场入球大值得再追。