今晚有六十几场波，难免花多眼乱，阿King诚意推介挪超班霸洛辛堡，佢哋一向人才鼎盛，为重夺联赛冠军，决心毋须怀疑，今仗作客有欧霸后顾嘅特林素，胜算甚高，小让平半不容错过。

　　(周一凌晨1时开赛)

　　今季挪超竞争激烈，不过异军突起嘅史卓加斯特一轮虚火过后，终于畀洛辛堡迎头赶上杀上榜首，并抛离史军五分，联赛剩番八轮，只要小心翼翼发挥稳定，相信冠军非洛辛堡莫属。对手特林素被欧战所累，国内表现跌晒Watt，该队上一次于联赛赢波已经係六月尾嘅事，证明佢哋嘅阵容太单薄，难以应付两线作战，最惨係特军杀入欧霸分组赛，嚟紧周中仲要作客英超劲旅热刺，话佢唔分心就假，就算有地利都靠唔住。相反人强马壮嘅洛辛堡心无旁骛，现时可专心冲击联赛及挪盃，况且近六次碰头赢咗四次，摆明係食住特林素，上盘有1.98倍非常抵玩。

　　奥沙辛拿「+1」有「基」

　　至于西甲基达菲主场迎战奥沙辛拿，两军开咧演出差强人意，不过奥沙辛拿当机立断，怒炒教头文迪列巴，并委任查维加西亚接掌兵符，首度领军梗係要省靓块招牌喇，一于捧有新帅效应嘅奥沙「让球客胜」。最后巴甲山度士主场火併保地花高，山军失去尼马后演出反覆，有名将施多夫压阵嘅保地花高挟住三连胜嘅威势，作客赢埋唔奇，有得受让咁笋梗係拣下盘。