歐國盃：龜縮三獅 突襲瑞典
2012/06/15文:鄭少偉

錯就要認，打就要企定！歐國盃未開波前，「亨利」一直唔多睇好英格蘭，不過睇完佢哋上場以「悶蛋足球」守和法國後，雖然踢法畀球迷狂鬧，但成績大過天，所以「亨利」決定認衰轉軚，睇好三獅兵可以出線。今晚D組第二輪賽事，英格蘭喺基輔火併瑞典，我撐佢哋嘅穩守突擊戰術有力贏波，捧2.15倍客勝！

佐敦軒達臣 禾確特或擔正
三獅兵首戰對法國悶足全場，場波表面睇節奏緩慢兼埋門少，尤其睇開英超波節奏咁鬼快，但國家隊就踢到好似元老賽咁。賽後唔少行家都狂轟教頭鶴臣嘅「龜縮足球」唔掂，不過「亨利」就唔係咁睇喎。

「亨利」先同鶴臣講聲Sorry！其實我好欣賞佢喺今屆決賽周嘅部署，事關全世界都睇死佢教唔得出啲咩成績，既然無論點教都畀人鬧，橫死掂死不如放手一博，一改英格蘭向來自視強者嘅風格，改玩死守足球等機會突擊，結果真係殺出條血路喎！

瑞典艾文達 史雲遜回歸正選
講真，英格蘭土炮前鋒今季表現Sharp醒啲嘅就只有韋碧克、禾確特同朗尼。當中「魔童」今晚繼續坐波監，其餘兩個又未可以獨當一面，咁嘅形勢唔踢穩守突擊可以踢乜呀！

睇番佢哋條防線，中堅尼史葛同泰利都係世界級，兩閘A高同格連莊臣又係能攻擅守，加埋穩健門神赫特，三獅兵嘅防線係近年最完整，就算上場失嗰球都只係赫特視線受阻，錯失唔大。

中前場方面，有傷嘅柏加如果唔踢得，就由佐敦軒達臣頂上，活力隨時有增無減。為咗平衡中場線嘅經驗，鶴臣考慮緊派禾確特頂阿歷士張伯倫踢正選，總之以佢哋幾隻後生快翼衝刺，要攻陷死氣沉沉嘅瑞典應該唔難。就算話瑞典有前鋒艾文達同中場安達斯史雲遜復任正選，「亨利」都照捧三獅兵客勝，有信心嘅話博埋4.35倍「讓客」都得呀！

橫數千軍
瑞典伊巴謙連續4仗入波

‧ 2012年嘅全勝走勢隨上場敗予烏克蘭而結束。

‧外圍賽攻入31球，數目僅次於荷蘭及德國列第3。

‧美爾保係瑞典史上首個出席4屆歐國盃決賽周嘅球員。

‧射手伊巴謙莫域連續4場有波入。

‧連今屆在內，最近5次打入決賽周，13場分組賽得4勝4和5負，7次開入球大。

英格蘭鶴臣揸弗入波少

‧近6次出戰決賽周，有4次於分組賽出局。

‧ 近43年以嚟，未試過喺正式賽事擊敗瑞典。

‧過去14次於決賽周賽事先開紀錄，不過當中得6場贏波。

‧領隊鶴臣自上任以嚟，領軍3場得2勝1和，每場都只入1球，但只係失咗1球。

‧ 連熱身賽在內，近6次與瑞典對壘得1勝4和1負，其中5場開細。

亨利推介：
英格蘭