卢特立出口术扰乱红军

　　英超星期一由史云斯主场对利物浦，值得捱夜捧场。虽然红军主帅罗渣士同射手史杜列治呢期顺风顺水，分别获选为英超8月最佳领队同球员，但史云斯教头米高卢特立赛前出口术，质疑史杜列治点解咁快好番，出到心理战扰敌，加埋佢哋嘅人脚唔差得过红军，主场出击受让平半，下盘有计!(now621台周二凌晨3:00直播)

　　史杜列治神奇伤愈被围插

　　利物浦开季连续3场联赛赢1:0，包括国际赛期前主场打爆曼联，除咗为今场领军倒戈嘅罗渣士争番啖气，史杜列治更加係风头趸，计埋联赛盃连续4场入波。不过咁，最近史杜列治以大腿受伤为由，拒绝为英格兰国家队披甲，搞到满城风雨，讲真，「三狮兵」上仗斗乌克兰关乎世盃出线生死，但史杜列治竟然阔佬懒理，难怪连昔日红军王牌奥云都喺twitter凑热闹，暗寸史杜列治诈伤唔要得。

　　史云斯领队米高卢特立唔係善男信女，喺赛前专登翻炒呢单嘢扰敌，佢仲公开插史杜列治缺席国家队赛事几日，就可以「神奇伤愈」为利物浦上阵，呢位丹麦名宿仲整多一句：「都好嘅，我都想史杜列治好番正选披甲，因为我要砌低最强阵容嘅红军!」相当寸嘴。当然，其实利物浦有王牌苏亚雷斯继续停赛，右闸格连庄臣养伤，而且有3件新兵等出场，反而会破坏赢波阵容搅乱档。

　　史云斯主场硬淨对赛不败

　　上届联赛盃冠军史云斯紧接要喺欧霸盃作客华伦西亚，但佢哋开季表现普通，相信会顾掂联赛先算。仲有，史云斯射手米捷係红军长期收购目标，可惜罗渣士嫌贵冇买到，赛前米捷话非常期待同利物浦较量，摆明想证明自己嘅3,000万镑身价唔算贵，兼且史云斯升班后主场对红军有1胜1和未输过，受让平半有得谂!

　　乜都玩锦囊 红军冇火1.8倍细都抵玩

　　如果大家觉得利物浦个势勒唔住，冷敲下盘太冒险，咁1.8倍入球细都值得留意嘅，毕竟红军冇咗苏亚雷斯，开季3场联赛都只係赢1:0，锋力唔算太强，何况利物浦领队罗渣士带过史云斯，唔会谂住大炒对手咁狠心啩，以和为贵打和开入球细唔奇喎。

　　Data King 利物浦连续3战开1:0/1:0

　　‧史云斯开季7战有6仗半场保持不失。

　　‧利物浦只差1场，就会达到球会史上英超第400场胜仗。

　　‧红军连续3场联赛开半场1:0、全场1:0波胆。

　　‧史杜列治近9次为利物浦喺正式比赛上阵入11球。