一个夏天有3件主力离队，试问有边个估到罗马嘅表现仲掂过上季吖?开季连赢两场嘅「雌狼」今晚喺意甲独脚戏造访帕尔马，意大利媒体收到风，「罗马王子」托迪计划续新约踢到收山，淨係呢单利好消息都足以振奋军心，作客小让仲未开斋嘅帕尔马平半，1.99倍上盘捧得过吖!

　　(开赛时间：周二凌晨2:45)

　　「雌狼」生力军对办

　　马昆奴斯哥利亚、拉美拿、奥斯华度相继离队，以为罗马元气大伤?咁你就错嘞，罗马开季连环砌低利禾奴同维罗纳，一班生力军好似门将迪沙迪斯、中场史杜特文、拿积同前锋谢云奴不知几对办，当中迪沙迪斯开咧两仗都保住清白之身，拿积更被大讚完美填补拉美拿离队之后嘅空缺，新帅鲁迪加西亚真係应记一功。

　　帕尔马中后场伤兵多

　　赛前有消息指罗马嘅美国班主柏路达即将飞嚟意大利，特登同托迪倾续约，据讲「罗马王子」初步答应续约两年，计划留队留到40岁「安享晚年」，Fans同队友都肯定开心到爆!对家帕尔马喺开锣战咬唔入基尔禾，上仗全场捱打输畀乌甸尼斯1:3，后衞柏列达同中场加路柏仲养紧伤，成队得个回晒塘嘅卡斯辛奴同阿马利孭飞，边似会恶得出样吖!