四支身處死亡B組嘅隊伍都仲有機會出線，形勢最好當然係揸住6分排榜首嘅德國啦！雖然佢哋今晚對丹麥攞1分就完成任務，但領隊勒夫賽前就指丹麥比較主守，唔排除會轉打三人後防谷行火力， 佢口脗今鋪唔似會揸流攤，讓半一1.9倍「上盤」信得過。

德國今晚只要攞1分就篤定首名出線，唔少人都估卻奧斯同舒爾賀尼等副選兵有機會落場，不過就算主帥勒夫出副選，戰鬥力都高丹麥幾班。右閘謝路美保定儲夠兩張黃牌要坐波監，根據德國《圖片報》嘅投票顯示，有45%球迷希望拿斯賓達擔正，勒夫就話自己大把選擇，就算唔出拿斯賓達都仲有舒姆沙，再唔係改打三後衞都仲得。

勒夫咁有信心，皆因佢老人家話丹麥以防守為主，德國有本錢擺大個頭喪攻，睇個款唔似淨係想攞1分喎！丹麥上場臨尾香輸畀葡萄牙，西蒙保臣畀人彈防守唔盡力累輸波，最弊係佢哋試過走甩C朗兩次，防線睇落唔多信得過。大家都有眼見德國前鋒馬里奧高美斯係幾咁弗，加上賽前接受物理治療嘅奧斯爾傷勢無礙可披甲，丹麥條後防都咪話唔惡頂！

丹麥中場森寧尋日向《DR》電視台體育頻道透露，呢幾日猛做按摩先令到小腿肌肉冇咁痛，今鋪都只能夠紮住上，但右翼羅美度就因傷肯定唔出得退埋隊，兼且領隊摩頓奧臣賽前竟然認低威，話兩隊波嘅球員根本唔同Level，扯晒白旗咁款，想重溫20年前歐國盃決賽砌低德國封王美夢？難啲咯！

 丹麥對賽半場少波入

‧近10次鬥德國只係試過1次喺上半場入波。

‧3次同德國喺決賽周碰頭，總入球都係2球。

‧最近3次鬥德國錄2勝1和成績。

‧犯規次數高企，2場分組賽總共有30次。

‧今屆賽事14次射門中框，比德國還要多1次。

 德國連續2場先開紀錄

‧唔計熱身賽，近13場正式賽事全勝。

‧近8仗「單單」、「雙雙」輪流開。

‧頭2場分組賽都能夠先開紀錄。

‧B組獲角球次數最少球隊，2戰僅得7次。

‧已有3球進帳嘅馬里奧高美斯，平均每2次起腳就入1球。