歐國盃：西班牙為尊嚴踢波 同格仔兵鬥駁火
2012/06/18文:走肖

歐國盃C組話題之戰今晚上演，到底足球世界有無公義，好快就知。呢場波好多變數，但只要西班牙同克羅地亞喺C組最後一戰，踢成2:2、3:3或更大比數和波，同組嘅意大利無論贏愛爾蘭幾多球都即刻玩完，到底世界盃冠軍西班牙會唔會踢「默契波」，今晚全世界睇到實。雖然戰果難測，但既然「鬥牛兵團」打算再變陣開猛火，睇怕入波唔會少，索性玩1.59倍入球大好過。

收起沙比 費托法比爭士哥
形勢上西班牙唔輸已肯定首名出線，克羅地亞和波都有出局危機，照咁睇，打和2:2的確對兩隊都有利。不過咁，西班牙同克羅地亞對足球好有堅持，賽前雙方教頭迪保斯基同比歷搬埋國家尊嚴上枱，大聲話打默契波正衰公，照咁睇兩隊唔似會搞啲咁嘢。

不過世事無絕對，眼前利益好易令人蒙蔽，既然唔肯定西班牙同克羅地亞諗緊乜，都係穩陣啲玩入球大着數，特別係賽前有消息話，迪保斯基繼首仗排出「零前鋒」怪陣，再突然安排連失兩次單刀嘅費蘭度托利斯打正選後，呢場又有新搞作，據講佢準備抽起黃牌在身嘅沙比阿朗素，打少個防守中場加強進攻火力。

克羅地亞唔玩嘢都夠料入波
即係話，費托同法比加斯會同時正選上陣，佢兩個要為嚟緊正選席位而戰，今場冇理由揸流攤。另一方面，克羅地亞出唔出到線未知，不過中鋒文迪蘇傑被愛華頓睇中係事實，佢暫時喺2場分組賽攻入3球，配合射手謝拉域、中場莫迪歷同隊長達里祖史拉，牌面唔算曳，唔靠「2:2世紀和局」都夠料射破西班牙大門，喺今場開入球騷。

橫數千軍
 克羅地亞4次交手得1勝

‧獨立後以往3次出席決賽周，96年及08年躋身8強，04年分組賽出局。

‧連同今屆，近4次出戰決賽周分組賽11戰得6勝3和2負。

‧過去4次對賽得1勝1和2負。

‧外圍賽得7勝1和2負次名出線，附加賽淘汰土耳其。

‧文迪蘇傑今屆埋門4次攻入3球。

 西班牙16場正式比賽不敗

‧以往共8次出席決賽周，並先後喺1964年及2008年奪得冠軍。

‧連同今屆，近5屆分組賽14戰得8勝4和2負。

‧上屆歐國盃3場分組賽全部開出入球大。

‧連續16場熱身賽以外正式賽事不敗。

‧外圍賽10戰全勝。

C組各隊出線條件
西班牙：贏或和皆肯定出線，輸波的話，則要寄望意大利對愛爾蘭失分。

克羅地亞：贏波肯定出線，失分的話，需要寄望意大利對愛爾蘭失分，但若以2:2或以上比數和波，則毋須理會意大利賽果。

意大利：必須贏波，同時要寄望克羅地亞與西班牙分出勝負，或以0:0打和。若西克踢成1:1，則計得失球定斷。

愛爾蘭：篤定出局。