歐國盃：英意鬥踢守細波
2012/06/24文:鄭少偉
同樣喺分組賽保持不敗殺入8強嘅英格蘭同意大利，今晚喺8強壓軸戰交鋒，查實兩班波都係穩陣行先以守為主，「亨利」估計今場多數一球起、兩球止，1.38倍入球細應該冇走雞，單買夠穩陣可賺餐晏仔，想博大啲就拎嚟做過關膽啦！

唔少粉絲都覺得今屆英格蘭班球員係歷來最團結，以往每逢大賽佢哋例必定有負面新聞，但點知今屆成班波咩醜聞都冇，證明佢哋已經將注意力集中喺比賽，絕對係一大突破。

英格蘭捧盃袋2.4億獎金
其實好多英超球隊都有死對頭點都溝唔埋，好似曼聯同利物浦球員往往喺國家隊就各自為戰，不過贏烏克蘭正係紅軍謝拉特助攻畀紅魔嘅朗尼，真係估佢唔到呀！

再者，三獅兵隊中氣氛良好，其實同獎金都有關。「亨利」收到風，佢哋分組賽出線後已袋多咗220萬鎊，如果捧埋盃，成班人可以瓜分成2,000萬鎊獎金，有咁大舊獎金做「餌」必定鬥志高昂，意大利想贏波唔容易o架！

意大利莫達拉傷大腿缺陣
不過，「藍衫軍」都唔係善男信女，雖然話佢哋要靠西班牙幫手先驚險出線，但佢哋嘅區域聯防真係幾穩陣，強如西班牙都只係入得佢哋1粒，3場僅失2球絕對唔失禮。

其實嚟到8強大家實力都冇乜高低，肯定會踢得保守啲，撞正今場兩班波都係以守為攻，隨時要鬥到互射12碼分勝負。雖然話意大利有中堅基亞連尼養傷，但搵邦路斯頂替唔差幾多，中場莫達拉傷大腿缺陣亦影響唔大，同喺鶴臣手下守得幾好嘅英格蘭交鋒，唔慌會多入波，玩入球細就啱數！

橫數千軍

英格蘭擅長先開紀錄
‧對上2次躋身8強都要互射12碼分勝負，96年對西班牙獲勝，04年對葡萄牙落敗。

‧分組賽得2勝1和首名出線，1次開大，2次開細。

‧連續3場分組賽都先開紀錄。

‧鶴臣領軍後5戰得4勝1和。

‧22次交手得7勝6和9負。

意大利連開3場細
‧近2次入8強00年贏羅馬尼亞2:0，08年悶和西班牙後互射12碼落敗。

‧分組賽3戰都開入球細。

‧柏蘭迪利執教後13場正式賽事得9勝4和。

‧隊中有9名球員有黃牌在身，再攞牌下場要停賽。

亨利推介：
英格蘭