紅鑽無心戀戰直取三箭W
2012/06/27文:走肖

日聯盃分組賽最後一輪賽事今晚展開，浦和紅鑽喺A組主場對廣島三箭，由於雙方都已經出線無望，自然唔會派出最強陣容應戰，日前紅鑽只得12個球員出席「6打6」操練，正選球員集體失蹤，相信三箭會贏多場，向曾經帶領佢哋出戰亞冠盃嘅紅鑽教練柏杜域「致敬」。

正選球員操練失晒蹤
現時紅鑽得6分，落後榜首嘅磐田山葉6分，其餘有3隊得9分騎住佢哋，已經無緣出線！何況紅鑽目標係重奪亞冠盃參賽資格，之前嘅日聯盃分組賽根本當係熱身賽咁玩，亂咁變陣完全冇章法，加上星期一嘅操練，上場聯賽對仙台維加泰嘅11個正選全部冇出現，今場唔慌會強陣出戰。

如無意外，呢場紅鑽會依賴剛啱傷愈嘅射手田中達也，同埋今季徹底失去正選位置嘅中場山田暢久孭飛，戰意成疑兼副選上陣，想開W真係唔容易。至於得4分嘅三箭，固然都已經出局，但佢哋喺今季日職首循環，曾經喺主場以1:0砌低紅鑽，證明唔會因為對手教練係柏杜域而放軟手腳，呢場隨時又踢爭氣波，2.75倍客W有冷味。

日聯盃賽制：
由14支毋須參戰亞冠盃之日職球隊角逐，分兩組踢單循環小組賽，每組首、次名躋身淘汰賽。