歐國盃：「神女」打氣 葡軍唔驚狂牛
2012/06/27文:鄭少偉

歐國盃4強打到嚟，今晚先有葡萄牙大戰西班牙！「亨利」知道有隻嚟自葡萄牙嘅「神女」八爪魚Pauline，佢睇法同我一樣，貼鬥志好嘅葡萄牙頂得住西班牙，受讓半一梗係要1.7倍下盤！仲有兩隊都係主攻型例牌多角球，角球大細中位數11.5球要捧2倍大！

八爪魚Pauline貼葡萄牙
咪話「亨利」迷信，但有時睇吓啲神獸預測，或會得到啟示。自從保羅辭世，保羅二世又金盆洗手，「亨利」 聞一隻由葡萄牙《晨報》喺大海救番嚟嘅雌性八爪魚Pauline，上圈已貼中葡萄牙砌低捷克晉級。日前又再為今晚4強戰預測，結果Pauline喺兩個分別貼上葡萄牙同西班牙國旗嘅食物箱，揀咗葡萄牙嗰邊開餐！

當然，今屆唔少國家都大玩神獸預測，命中率普遍麻麻，就算係「神女」都未必中硬。但今次佢同我「英雄所見略同」，呢場「伊比利亞半島打吡」，西班牙至今表現未達預期，無論係用法比加斯打箭頭嘅無鋒陣，定費托擔正都好，係就係場場贏晒控球權，但每當去到對方心臟地帶，又焗住搓返出嚟，欠缺實際埋門。

兩隊鬥攻捧埋角球大
點解會咁？「亨利」認為佢哋爭個好似韋拿咁嘅超級前鋒，搞到前線冇傳送目標。講真，8強對法國輕鬆贏波全因對手成盤散沙，再者「鬥牛兵」之前已講明今晚唔會派專人凍結C朗，隨時走甩呢位「萬人迷」仲危險，尤其係碧基同埋沙治奧拉莫斯兩個唔算好夾。

葡萄牙論實力或者唔及西班牙，但講鬥志肯定唔輸蝕。人人都話佢哋係C朗一人球隊，又話佢經常大賽隱形，但今屆C朗心入面嗰團火猛到不得了。雖然唔少人話佢浪射，但正如有師兄教落，肯起腳起碼有5成機會入波吖，就算葡萄牙今晚有前鋒普斯迪加養傷，應該都係場對攻大戰，一於博下盤加角球大啦！

橫數千軍

葡萄牙旺開半場和
‧今屆歐國盃獲3勝1負，3次開出半場和。

‧C朗只要入多1球，就可以22球追平哈根蘇古及湯馬臣所保持嘅歐國盃入球紀錄。

‧今屆起腳6次中柱中楣，打破歷屆紀錄，單係C朗已有4次。

‧史上34次交手獲7勝12和15負，入43球失70球。

‧7次大賽交手得1勝2和4負。

西班牙18戰不敗
‧正式賽事已保持連續18場不敗佳績。

‧今屆歐國盃獲3勝1和，4仗半場均開細。

‧在正式比賽嘅淘汰賽已保持8場不失。

‧近21場大賽有20場控球率超過50%或以上。

‧若能成功擊敗葡萄牙，將成為70年代西德後，首支連續3屆殺入大賽決賽嘅球隊。

亨利推介：
葡萄牙