歐國盃：意大利頂「德」住
2012/06/28文:鄭少偉

今晚歐國盃4強第2擊輪到德國決戰意大利，日耳曼兵團喺晉級過程表現出色，人腳又近乎完美，自然被睇高一線。不過學新聞界前輩伍晃榮話齋—「波係圓嘅」，嚟到淘汰賽咩都可以發生，考慮到意大利對賽往績贏晒，心理佔優，德國讓半一，「亨利」一於撐1.7倍下盤！

德國變陣出「熟路」高路斯
德國由分組賽至8強保持全勝，表現冇得彈。其中前線演出完美，無論係用馬里奧高美斯定高路斯，都一樣交足功課。賽前記者會領隊勒夫帶同老將高路斯出席，後者仲出言狠批意大利冇料到，又話自己喺拉素已經摸清意大利防線嘅特點，講到信心十足。加上「亨利」見佢上場又同奧斯爾擦出火花，難怪傳緊勒夫今仗會用「Goal老師」擔正啦！

不過，唔係話德國火力強就贏梗！皆因佢哋中場線大腦「小豬」舒韋恩史迪加正受足踝傷患困擾，今場要勉強紮住上；右閘又話可能再次改用拿斯賓達頂替謝路美保定，默契又隨時差咗啲。況且佢哋近2仗對住丹麥同希臘合共失咗3球，防線有漏洞㗎，今晚面對實力更強嘅意大利，隨時衰多幾錢重啦！

意大利3將傷愈
意大利上場要苦戰120分鐘後先靠互射12碼淘汰英格蘭，雖然話過程艱辛，但「亨利」睇見班藍衫軍體能仲係應付有餘，相信可以回得切氣今晚打德國。更加對佢哋有利嘅係，之前傳出嘅3名傷兵—中場迪羅斯、守將阿比迪同基亞連尼都及時傷愈，唯一係右閘馬治奧停賽要稍作變陣，不過依然算係強陣出擊。最重要係佢哋歷來7次大賽對德國有2勝5和未輸過，擺明係格食格，今場受讓下盤應該好穩陣啦！

橫數千軍

德國半場勝和隔住開
‧8強鬥希臘比「英意戰」早，比意大利多兩日休息時間。

‧正式比賽已連贏15場，並且係今屆歐國盃唯一全勝隊伍。

‧對上一次擊敗意大利係1995年嘅熱身賽。

‧過去7次喺決賽周對意大利未贏過。

‧今屆4場歐國盃梅花間竹咁開半場勝半場和。

意大利今屆全開「雙細」
‧歷來30次對德國錄得14勝9和7負佳績。

‧今屆賽事4個入波，分別嚟自唔同球員。

‧經歷4場歐國盃之後只失2球。

‧今屆4場賽事全開入球細及入球雙。

‧同德國一樣，今屆未試過半場落後。

亨利推介：
意大利