歐國盃：54億星戰捧意軍
2012/07/01文:鄭少偉

歐國盃決賽爆54億星戰！今晚西班牙火併意大利兩隊身價當然不菲，但經過漫長賽季及決賽周頻密賽程，勝負關鍵將取決於雙方體力同決心，呢兩方面我都秤先意大利，受讓平半捧下盤。

西意兩隊星光熠熠，球員總身價接近54億港元，當中鬥牛兵個35億正選陣，力壓意軍嘅19億秤先，但講到實力就未必高好多。皆因佢哋今屆賽事無論排無鋒陣定出單箭頭，效果始終唔多好。賽前消息話主帥迪保斯基會用法比仔擔正，「亨利」都明白佢苦心，呢個已經係最好嘅選擇。

西班牙無鋒陣法比仔正選
鬥牛兵踢唔出最佳水準，其實同幾件主力出現疲態有關。上場賽後就有報道話沙維踢踢吓呼吸困難，要提早退下火線，始終鬥牛兵係以巴塞同皇馬做骨幹，唔少球員今季都踢超過60場波，真係鐵人都死！

況且西班牙就算Keep得住個波，球員都冇咗昔日嗰種求勝嘅飢餓感，「亨利」都踢過唔少決賽，覺得嚟到大賽體能、戰意同決心先係最緊要，西班牙呢3方面輸蝕都幾大鑊o架！

意大利夫添愈踢愈好
事實上，意大利今屆賽事愈踢愈好，上場4強淘汰德國更係代表作。你睇上場贏波後保方都要鬧隊友唔集中，就知佢哋個個鬥志十足。人腳方面，右閘阿比迪傷愈，馬治奧又波監刑滿，卡斯辛奴話有膝傷，但預計會踢得，主帥柏蘭迪利大把籌碼喺手，有消息話佢覺得壓力大想辭職喎！哈，贏埋今場咪冇晒壓力囉！計我話意軍今晚受讓要捧，夠膽嘅要埋客勝都得！

橫數千軍

西班牙今屆5戰半場全細
‧若捧盃將成歐國盃首支衞冕冠軍兼追平德國3次奪標紀錄。

‧大賽19場不敗，喺淘汰賽已累積9場不失。

‧史上30次交手得8勝12和10負。

‧今屆歐國盃只計法定時間獲3勝2和，半場全開細。

‧費蘭度托利斯若入波將成歐國盃史上首位在2屆決賽均入波球員。

意大利打加時唔識入波
‧今屆歐國盃只計法定時間獲2勝3和，有4場開細。

‧近8場大賽法定時間只獲2勝。

‧領隊柏蘭迪利喺今屆外圍賽及決賽周未輸過，得10勝5和。

‧歐國盃史上7次打加時都未入過波。

‧巴洛迪利入多1球的話，將獨佔意大利決賽周史上入波最多球員之位。

亨利推介：
意大利