希堡叉足電強爆加費萊
2012/07/02文:朱楓

隨住歐國盃結束，嚟緊北歐聯賽將會擔大旗。今晚瑞超有希爾星堡主場鬥加費萊。希堡叉足電後係時候嚟料，捧2.05倍「讓主」！

為咗讓路畀歐國盃，瑞超抖咗超過1個月後，啱啱喺上周末終於重開。去季冠軍希爾星堡喺上半季表現令人失望，為咗喺下半季盡快收復失地，球隊近日安排咗3場熱身賽，結果獲得2勝1負，每場仲至少入2球，睇嚟狀態已返晒嚟，加上門將柏漢臣踢完歐國盃回歸，雖然呢位25歲門將喺歐國盃冇上過陣，不過朱楓認為咁樣正刺激到佢嚟緊更努力去爭位，今晚話唔定會有上身演出。

教練團隊換血重振聲威
更加犀利嘅係，希爾星堡矢志重拾瑞超班霸地位，最近更有新人上場，助教寧治上月被解僱，球隊竟然搵到瑞典名將舒華斯接替，球會經理亦由前挪威國家隊主帥哈雷德接任，教練團隊經驗更加豐富，今場當然要贏波壯聲勢，兩人亦表明今季要幫希爾星堡打出身價，證明佢哋依然係國內第1強隊。

目前排下游嘅加費萊近期睇落表現唔錯，休季前主場贏奧雷布洛，之後喺熱身賽連贏阿維達貝治同辛斯華爾錄得3連勝，但其實3個對手實力都一般，參考性唔高，再睇埋佢哋近6次作客希爾星堡未贏過得1和5負，鋪鋪都輸2粒，今晚真係唔值得為佢哋扒冷！