自由盃決戰撐哥連泰斯
2012/07/04文:力奇

萬眾矚目嘅南美自由盃決賽 朝上演次回合，首回合阿根廷班霸小保加喺主場僅能踢和哥連泰斯1:1，今次輪到作客巴西，仲有首回合入球功臣朗卡尼亞因搞唔掂保險被逼缺陣，實力勢必大減。力爭首個自由盃冠軍嘅哥連泰斯讓平半，我撐1.74倍上盤！

小保加曾6次捧走自由盃，論經驗一定好過首次打入決賽嘅哥連泰斯優勢，只可惜佢哋高層根本冇預算會打入決賽，早排先後賣走守將朗卡尼亞、舒希艾維同前鋒施維坦歷治。3件主力本來都係喺上周末約滿離隊，雖然話最終傾掂數，舒希艾維同施維坦歷治都可以「延期居留」，踢埋今仗先走，但已經簽約過檔費倫天拿嘅朗卡尼亞，則因為搵唔到國際認可嘅保險公司擔保，球員經理人拒絕放人，今戰焗住唔踢得。

今屆13戰未輸過
哥連泰斯呢邊，力爭創會以來首個自由盃冠軍，鬥志肯定驚人，齋係睇佢哋完全放棄新季巴甲，擺明就係將全部注意力放喺自由盃。佢哋喺今屆賽事踢13場都未輸過，防線仲要只係失4球堅到爆，前線又有新星羅馬連奴加盟2仗入3粒，腳風大順，即使話中場重心佐治漢歷基大腿傷要紮住上陣，恃住地利應該可以贏波捧盃！

自由盃賽制：
採主客兩回合淘汰制，今輪為決賽次回合，不設作客入球優惠，若總比數相同，需於次回合後加時作賽，再和就互射12碼決勝。