歐國盃：瑞典法國玩鋪大
2012/06/19文:麥馬拿仁
一隊為啖氣 一隊唔敢留
瑞典已經出局，冇必要同你守，一個唔覺意先入一粒，法國想留力都冇得留！歐國盃D組最後一輪瑞典鬥法國，法軍領隊白蘭斯話諗爆頭，甚至想次名出線留喺頓涅次克賽區，但瑞典攻強守弱有力入波，法國如意算盤未必打得響，分分鐘要出盡攻擊手求勝，捧大！

法國頭兩場分組賽攞到四分，同英格蘭同分，烏克蘭三分排第三，瑞典○分已經出局。法國今場多取一分就肯定出線，甚至輸都仲有價講，所以白帥已諗定8強走線，佢話如果以次名出線，就可以留喺頓涅次克賽區，有助球員休養生息，但佢好似唔記得，次名出線隨時要對C組首名西班牙，而且踢波嘅嘢冇得咁計，法國有前車可鑑，一個唔留神就會好似俄羅斯咁輸畀希臘，要執包袱返歸。

瑞典進攻有料到
瑞典雖然兩戰全敗，不過實際演出唔曳，只係防守力較差，門將伊沙克臣、格蘭基斯、莊拿斯奧臣等只係二、三線球員，領隊咸雲又崇尚進攻，故分組賽已入三粒，兩場都係開大。伊巴謙莫域話瑞典將為名譽而戰，就算出局都要好好睇睇，今戰必打得進取，艾文達、托禾倫、施巴斯坦拿臣都有力數胡，今戰或會殺法國一個措手不及。法國方面，賓施馬狀態極佳，肯定想入波開齋，今仗捧大盤啱數。

角球方面，瑞典上戰鬥英格蘭，雙方都打兩翼側擊，但夾埋只得六個角球，法國重控球在腳及小組入滲，今場特別項目投注角球大細繼續捧細