歐國盃：淘汰賽策略下盤為先
2012/06/21文:SAMVO肥叔

歐國盃分組賽階段打晒，大戶喺D組最後一輪兩場捧晒下盤，結果一輸一贏，先講英格蘭嗰場，英軍老帥鶴臣好實際，完全唔理比賽過程，淨係要三分，佢哋大部分時間捱打，但最終都能贏波首名晉級八強，令唔少人跌眼鏡，呢班波家陣實而不華，唔好睇得太低。

小心名牌陷阱
另一場法國輸畀瑞典，真係令人好失望，肥叔本來視佢哋為冠軍心水，睇完尋晚場波後，法軍踢落完全唔似樣，喺八強要撼西班牙，睇怕都係凶多吉少，皆因兩隊踢埋同一家波，大家都係地面推進，西班牙級數高好多，格食格冇得傾！睇勻各隊表現同目前形勢，肥叔始終認為德國同西班牙捧盃機會較高，兩隊確係熱得有道理。

跟住同大家睇吓歐國盃八強投注策略喇，非常簡單，就係以下盤為先！睇番多年來歐國盃八強戰，賽事形勢都係好接近，老實講，去到呢個階段，大家都有番咁上下級數，強弱分野唔大，分分鐘要打到加時甚至射埋十二碼先分到勝負。

個別名牌球隊讓得多，真係要小心考慮清楚，始終去到淘汰賽階段贏波先係最緊要，冇必要贏埋盤。

今晚八強戰頭場由葡萄牙對捷克，論名氣同人腳，葡萄牙都在對手之上，不過，肥叔早前同大家講過，大戶今屆一直鍾情捷克，證明呢班波必有過人之處，今次又有大樹遮蔭，絕對係出擊好時機，受讓半一盤口有利，捷克下盤值得留意。

肥叔心水
捷克 下盤