柳澤敦當旺仙台強襲浦和
2012/06/23文:朱楓

今晚日職直播前列大戰，由「三哥」浦和紅鑽主場硬撼榜首仙台維加泰。仙台老將柳澤敦上仗鹹魚翻生，配合已經傷愈嘅射手赤嶺真吾，有力摘取近期主場表現一般嘅浦和紅鑽，平手盤要捧客隊。

浦和近4次主場僅勝1仗
上季差啲降班嘅浦和紅鑽，今季表現大有起色，上仗作客反勝大阪飛腳後，唔經唔覺已經上到第3位，落後榜首仙台5分，不過領隊柏路域上仗賽後就認贏得符碌，今晚返到埼玉球場隨時被過分高估，畢竟紅鑽近4場主場只得1勝1和2負，雖然中場岡本拓也同鈴木啟太經已傷愈，可惜前鋒迪臣保保、伊斯古迪路、中場山田直輝同後衞平川忠亮仲未好番，人腳選擇真係唔多。

對家仙台維加泰今季持續大勇，上場主場對札幌岡薩多雖有射手赤嶺真吾缺陣，點知代佢擔正嘅前日本國腳柳澤敦卻梅開二度，帶領仙台贏4:1兼取得3連勝。雖然佢哋今仗有首席射手威爾遜洛迪古斯停賽，但好消息係今季射入5球嘅赤嶺真吾同中場關口訓充兩大主力已克服傷患，今晚九成九復出，配合鹹魚翻生嘅柳澤敦，朱楓睇好呢個「土炮三叉戟」對住浦和紅鑽會產生化學作用。