歐國盃：西班牙着火 劏弱雞冇手軟
2012/06/23文:鄭少偉

8強最激對碰 周日凌晨2:45
歐國盃8強戰今晚上演最強戲碼嘅西班牙大戰法國，兩支技術型球隊對撼，質素同狀態都佔先嘅鬥牛兵愈踢愈有火可秤高一線。特別係「高盧雄雞」今仗有防線重心麥薩斯停賽，後防漏洞多隨時變「弱雞」，1.67倍西班牙主勝值得捧場。

鬥牛兵飛千五公里捱高溫
喺分組賽取得2勝1和嘅西班牙，狀態明顯漸入佳境開始着火，由首場踢和意大利，到之後狂炒愛爾蘭，最後上場睇住克羅地亞嚟食，明顯一切都喺領隊迪保斯基掌握之中。以巴塞同皇馬成員為核心嘅鬥牛兵，家陣正處職業生涯高峰期，論技術同戰術配合都喺法國之上，大家鬥「搓」波唔通會驚班法國仔咩？

講真，「亨利」認為西班牙最驚只係天氣嘅適應，事關以波蘭格涅茲諾做大本營嘅鬥牛兵，今仗出發去比賽場地就要坐2個鐘頭機，飛成1,556公里先去得到烏克蘭頓涅茨克比賽。最慘係頓涅茨克近日天氣炎熱，去到攝氏35度高溫，對於落場球員嘅體能要求將會更大，所以「亨利」估計鬥牛兵就算贏得，都未必會咁輕鬆。

法國麥薩斯停賽
陣容方面，冇乜傷兵嘅西班牙可以強陣出擊，「433」陣式無論係費托定法比仔擔正，火力都一樣有保證，後備席仲有捷西斯拿華斯同尼格度候命，變化比法國隊更加多。

法國喺最後一輪分組賽畀瑞典終結23場不敗走勢，球員信心話冇受影響都冇人信。佢哋上場以麥薩斯為首嘅防線，面對住瑞典卡斯唐同韋希姆臣等快速反擊，明顯落入下風。今場仲有麥薩斯停賽，要搵哥斯尼頂上。雖則話之前哥斯尼拍住阿爾拉米踢2場都贏波，但始終當日對手只係美國同塞爾維亞，卡士點同鬥牛兵比，呢個後備中堅組合無論默契同速度都不足，隨時成為今晚法國不敵西班牙嘅關鍵。

亨利推介：
西班牙