柏雷素爾回勇冇留手
2012/07/14文:走肖

心跳死火唔識入第1000球
到底想點先？清水心跳宣傳球會史上第1,000個日職入球已經一段時間，點知竟好似中咗咒咁，愈講反而愈難入，過去兩個月竟然得1個聯賽入球！今晚佢哋喺日職主場對柏雷素爾唔似惡得出，受讓平半都咪制！

原本心跳有機會上榜首，點知球會高舉1,000球旗幟即刻領嘢，成班球員唔知禮讓定緊張，搞極都唔識入波，對上6場聯賽得大前元紀射入12碼，其餘5場全部食白果，以為上星期創會20周年紀念戰會發威，結果主場對川崎前鋒都係互交白卷！

李安度杜明基斯腳風順
最近心跳喺官網搞咗個投票，嗌球迷預測邊個會攻入1,000球，結果大前元紀同高木俊幸被睇好，各有超過1,500票支持，貴價外援保斯基1,000票都唔夠排第3位，證明佢完全唔得粉絲歡心，難怪消息話心跳諗住剷走佢。

對家柏雷素爾近期企番穩陣腳後，連盃賽近10戰有7勝1和2負，重現上季歷史性奪得冠軍嘅神奇表現，MVP李安度杜明基斯近5場攻入3球，睇得出佢已經上番力，就算中場大谷秀和停賽、右閘酒井宏樹轉投漢諾威都唔怕！