射手當旺希堡追捕新聖徒
2012/07/17文:走肖

歐聯外圍賽第2圈首回合今晚搶先上演，新聖徒喺主場對希爾星堡，主W真係唔值得冷敲，呢隊所謂威爾斯聯賽冠軍，近年踢歐洲賽完全唔夠班被糟質，相反上季瑞超冠軍希爾星堡有射手艾費特芬保加臣着火，為咗爭取出席分組賽掘金，睇怕對家呢場劫數難「徒」，不妨博2.12倍「讓球客勝」！

新聖徒歐戰成績慘不忍睹
其他唔講，上季新聖徒首席射手同最佳球員，原來係代表過新西蘭國家隊上陣過1次咁大把嘅前鋒德拉伯，佢哋隊友質素有幾高，大家心照啦！仲有呀，新聖徒上季喺歐霸盃外圍賽第2圈，兩回合計以3:8慘負丹麥球隊米迪蘭特，前季喺歐聯外圍賽第3圈兩回合計以1:6畀比甲冠軍安德列治玩死，你會唔會對佢哋有期望？

相反，雖然希爾星堡有前鋒辛甸同後衞艾美卡夫未克服傷患，但佢哋喺夏休過後開始發力，叉滿電對上3場得2勝1和，當中艾費特芬保加臣對加費萊連中三元，跟手對哥登堡又省多粒，簡直旺到爆。最難得係，依家希爾星堡連中堅都識入波，韋列艾達連續兩場有士哥，踩行油新聖徒點擋呀？

歐聯外圍賽賽制：
採主客兩回合淘汰制，今輪為第2圈首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時沒有入球，則需互射12碼決勝