法林明高誓爭主場4「連」勝
2012/07/18文:查理阿蛋

法林明高開季踢走「細哨」之後，本來都冇乜人睇好，點知反而愈踢愈順， 朝佢哋喺巴甲主場迎戰「作客蟲」哥連泰斯，小妹相信法林明高可以憑住主場強大嘅氣勢擊退哥連泰斯，主隊讓平半要捧上盤啦！

上場法林明高雖然大部分時間踢少個，仍然可以作客擊退巴希亞，隊波士氣自然大振啦！上場射入致勝12碼嘅卡路士連拿度，仲喺賽後盛讚一班後生仔隊友：「班年輕球員好識控制自己心態，令我哋班老鬼可以好冷靜咁應戰！」法林明高咁多件上位新秀當中，肯定要數年僅18歲嘅中場泰華里斯，上場波佢表演出色，今季亦已經開咗齋，令隊波增添唔少活力，加上射手路夫及中場保天尼利刑滿復出，法林明高梗係要食住個勢爭取主場4連勝啦。

哥連泰斯作客唔識入波
咪以為對家哥連泰斯捧咗個自由盃後，喺巴甲戰績即刻大反彈，實情係佢哋聯賽作客到依家只得1和3負，中間仲只係入過1球，火力弱到暈，新援荷西古里路又未出得住，尋日又落實放走中場阿歷士拉菲爾同前鋒列特臣，士氣麻麻，今場實在好難鬥得過強勢嘅法林明高。