安治踢爭氣波強爆漢維特
2012/07/19文:走肖

歐霸盃第2圈外圍賽首回合爆發，俄羅斯球隊安治今晚對匈牙利嘅漢維特，相信會踢爭氣波，讓兩球照開1.97倍「讓主」，事關安治因為安全問題被褫奪歐洲賽主場出戰權利，賽前伊度奧公開表示，希望UEFA重新考慮，睇怕安治會畀心機整番場好波大家睇。

伊度奧落力數胡
由於達吉斯坦地區經常出現暴力襲擊，令人擔心喺安治主場比賽有危險，正因為咁，呢場佢哋要喺莫斯科以外，鄰近練習場嘅拉緬斯科耶比賽。作為隊長嘅伊度奧，賽前向歐洲足協求情，佢話暴力襲擊只係部分壞分子所為，唔代表安治球迷鍾意搞破壞，為咗挽回球會形象，相信伊度奧會落力數多幾粒。

要留意嘅係，呢場係安治自01/02年球季出戰歐協盃第1圈以0:1不敵格拉斯哥流浪後，首次出席歐洲賽，上季安治喺聯賽得第5名，「神奇教練」希丁克冇理由想再失威。更何況，今季安治陣容並無大變，主力又算當打，31歲射手伊度奧踢歐霸盃外圍賽大把貨賣，中場施哥夫同中堅基斯杜化森巴都係28歲咋！

漢維特拉雜成軍
另一方面，漢維特喺09/10年球季出戰歐霸盃第3圈外圍賽，面對土耳其嘅費倫巴治兩回合計輸2:6慘敗，擺明唔夠班。事實上，目前漢維特嘅陣容非常立雜，但又唔覺邊個特別有質素，球員來自好多唔同歐洲同非洲國家，唔好話建立默契，睇怕連溝通都有問題，造訪俄羅斯好容易被炒起。