博諾高平1.82倍「主勝」
2012/07/23文:力奇

瑞超今晚有場褪色勁旅大對決，由7屆冠軍佐加頓斯出訪12屆盟主諾高平。近10場保持不敗嘅佐加頓斯，查實只係和波多過食飯，就算話足智彩今場開平手盤，都咪以為好着數，我就寧願捧佔地利嘅諾高平1.82倍「主勝」。

佐加頓斯遇剋星冇符
佐加頓斯最近一次奪冠係05年，近年表現幾令人失望。佢哋近10場聯賽話就話未輸過，睇真啲只係得2勝8和唔算突出。佢哋上星期就喺聯賽主場鬥諾高平，當日佢哋上半場31分鐘已經入波領先，可惜捱唔到尾完場前5分鐘被逼和，今晚作客仲有後衞馬克柏達臣同前鋒列查拉克素養傷，執到1分都偷笑啦！

諾高平對上一次奪冠要數到1989年，不過佢哋近年已經淪為3流球隊，好在今季叫做有番啲起色，近4戰攞到2勝2和唔失禮，要留意係佢哋上季兩鬥佐加頓斯都係凱旋而歸，好有格食格味道，今鋪返主場有望坐和望贏！