倫奧女子足球賽今晚搶閘爆發，日本女足今晚喺F組對加拿大女足，1.68倍主W抵捧。今次「粉紅兵團」保留大部分女子世盃冠軍成員出戰，擺明對呢面金牌志在必得。雖然大家姐澤穗希因為有傷，最近喺熱身賽連正選位置都冇埋，不過佢得到日本全民力撐，獲選為「幸福度最高」女性，呢場當然要踢爭氣波！

東瀛傳媒曾經擔心，作為女子世盃最佳球員嘅澤穗希，會因為傷患問題落選今次倫奧大軍，但日本女足教頭佐佐木則夫夠晒有情有義，除咗澤穗希照樣入選外，兩個超級後備前鋒丸山桂里奈同岩淵真奈，同樣喺有傷嘅情況下得獲得徵召，最近佢哋仲全部喺熱身賽亮過相添，戰鬥力唔需要擔心。

仲有呀，上星期日本女足以0:2不敵法國女足，澤穗希315日以來首次喺國家隊做後備，賽後佢向傳媒話，有信心應付90分鐘比賽，希望佐佐木則夫放心。但無論點，為咗保住正選位置，相信澤穗希唔會放過加拿大女足，聯同射手大野忍同隊長宮間綾打爆對手。事實上日本女足早就計劃用大野忍、大儀見優季打雙箭頭，其中後者仲話練咗一招中距射門殺着，睇得出好有決心贏波。

事實上，最近有調查顯示，澤穗希被選為2012年上半年日本「幸福度最高」女性，得票率38.9%壓倒性勝出，緊隨其後係藝人松田聖子、索模Rola同偶像綾瀨遙，證明澤穗希得到全民擁戴，連電視台TBS靚女主播枡田繪里奈都大讚佢有大家姐風範，講明會力撐。

另一方面，加拿大女足喺女子世盃分組賽連輸3場出局後，連教頭莫拉絲都冇心機走人，代替佢嘅靴特文以往只係帶新西蘭女足，唔慌叻得去邊，賽前更坦言話和波已收貨，就算王牌射手姬絲甸冼佳亞話要攻陷「粉紅兵團」大門，齋靠佢睇怕都好難搶到分。

女足F組