「2012聖殿盃英超挑戰賽」今晚喺北京鳥巢舉行，由新科英超冠軍曼城同勁旅阿仙奴合演好戲。不過咪話力奇潑冷水，始終兩班波狀態未谷起，又未齊人，發揮都唔慌好。加上係英超爭標對手過招，輸波好大機會影響士氣，踢法難免保守，今場一於博好分嘅2.02倍入球細啦！

上季喺英超壓過同市宿敵曼聯奪標，曼城實力當然唔講得笑，不過，大軍今次訪華名單就未見一眾踢完歐國盃嘅國腳，諸如巴洛迪利、大衞施華、拿斯尼同巴利等統統未歸隊。

「藍月亮」至今只喺奧地利踢咗3場季前熱身賽，僅得勝和負各一，啱啱嗰場雖然贏比錫達斯2:1，但距離最佳狀態仲有一大段距離。何況嚟自土耳其嘅比錫達斯只係歐洲二流貨色，點同阿仙奴比？

「兵工廠」開季以來一直都忙緊出售尹佩斯一事，嚟緊仲有冇呢位王牌帶住都未知，叫班球員點集中比賽？前日作客贏馬來西亞明星隊2:1，都要靠兩個小將末段入波先僥倖反勝，你估真係次次咁好彩咩？

再者，阿仙奴同曼城一樣，部分主力成員包括普多斯基同梅迪薩卡都冇嚟，其餘歸隊冇耐嘅禾確特同阿歷士張伯倫等就算落場，都未必會踢得太長時間。領隊雲格手上雖然仲有大班潛質新星等住登場，但始終經驗都有限，喺鳥巢咁大個場鬥曼城壓力唔細o架，踢落患得患失又點多波入先？