拜仁多蒙特開大片
2012/08/12文:走肖

歐洲「怒火」燒到德國超級盃！拜仁慕尼黑今晚喺主場對多蒙特，1.7倍入球大最抵玩，除咗兩隊分別有超級武器文迪蘇傑同馬高列奧斯登場，雙方嘅德甲超級巨星洛賓、列貝利同羅拔利雲度夫斯基喺歐國盃屈埋滿腔怒火，呢場肯定會搵對手出氣，戰意有保證玩大佢！

新兵打正選誓顯身價
上位要等時機，新加盟嘅拜仁慕尼黑中鋒文迪蘇傑同多蒙特中場馬高列奧斯，可能連個天都睇佢哋，原本係兩隊主力嘅馬里奧高美斯同馬里奧葛斯，咁啱因為傷病上唔到陣，即係話兩大新武器好可能同時打正選，要知道拜仁同多蒙特前線位置競爭激烈，佢哋咁大個人，點會唔識把握呢次機會上位呀？

再講，拜仁上季做咗歐聯、德甲同德國盃「3亞王」，高層同球迷只係未公開爆粗，假如呢場再畀多蒙特食住，就真係要搵窿捐，相信佢哋會同多蒙特鬥攻鍊番轉。上屆德國盃決賽拜仁以2:5不敵多蒙特，寧願輸得轟烈都唔肯投降等死嘅場面，隨時再出現，唔通拜仁唔想趁季初威番次咩？

邊個贏邊個捧德超盃最多
仲有就係，今屆歐國盃法國內訌自毀、荷蘭羞家包艇、波蘭主場小組出局，拜仁嘅列貝利同洛賓，多蒙特嘅羅拔利雲度夫基斯肯定唔好受，甚至有英雄變狗熊感覺，要挽回球會高層、隊友同球迷嘅信心，最實際係入波騷哥利，而且兩隊分別贏過4次德國超級盃，今場邊個贏就能夠成為歷來捧盃最多球隊，搏硬啦！

橫數千軍
拜仁平均每場省2.3球

‧過去7次出戰4次勝出。

‧上季聯賽入77球，平均每場入2.3球。

多蒙特對賽5連勝

‧以往5次出戰德國超級盃，有4次奪冠。

‧連續5次對賽贏波。