做人最怕冇腦，一隊波冇咗個大腦一樣死得，浦和紅鑽少咗個「巴西腦袋」，今日主場對住今非昔比嘅鹿島鹿角，想贏波好難，平手盤寧願要鹿島。

浦和家陣响日職排第4位，佢哋本來走勢唔曳，12場聯賽不敗，點知上場作客神戶輸波斷纜，道氣當堂打窒咗，至弊係個10號仔馬斯奧李察迪斯今場坐波監，中場群龍無首，剛啱代表日本友賽完委內瑞拉嘅後衞槙野智章又疲態畢露，練波嗰陣腳都遞唔起，冇「腦」兼冇力點贏波呀？

鹿島近況有些少起色，聯賽連盃賽兩連勝，而且佢哋防守比較緊密，何況由07年起5次作客埼玉，只輸過畀浦和1次，就算守將中田浩二養傷，但係疊埋心水死守，浦和未必咬得佢哋入。連日職官網嘅預測都話，如果浦和前面踢得唔夠多變，下下一條路去，想入波未必咁易，平手盤博客隊啦。