各位《太陽波經》嘅讀者好，我係今季加盟日之泉JC晨曦嘅張健峰，大家可以叫我「張峰」，好高興有機會作出新嘗試同大家傾吓波經，希望可以同大家齊齊贏錢啦！今日英超第一擊，小弟推介雄心壯志嘅昆士柏流浪，望佢哋喺主場「大」「勝」史雲斯。

經過漫長嘅暑假，新一季英超今日開鑼，各隊季前喺球隊軍容上都作出大大小小嘅調整，預期今季賽事比上季更加激烈。上季踢到最後一場奇迹護級， 大把錢嘅昆士柏流浪季前喺轉會市場掃貨，成功引入羅拔格連、朴智星同安袓莊臣等正貨，配合森莫亞、安頓費迪南等舊有班底，只要交出水準，今季相信唔使再為護級煩惱。睇番QPR季前熱身賽戰績，又真係幾吸引喎，5場錄得4勝1和，起碼唔使擔心球員今場信心唔夠先啦！

至於QPR嘅對手史雲斯，上季接連畀到球迷驚喜，踢出細膩悅目嘅進攻足球，表現值得一讚！不過，今季領隊由丹麥名宿米高盧特立接掌．代替轉投利物浦嘅羅渣士，可唔可以保持到細膩悅目嘅風格，「張峰」暫時就有啲懷疑喇！

無錯佢哋喺暑假期間由華歷簡奴引進咗中場米捷，應該可以彌補基菲爾施古臣轉投熱刺後嘅空缺，加上上季打出名堂嘅禾姆同史葛冼佳亞，整體實力應該保持到。不過話晒今場都係昆士柏流浪新季主場第一擊，一於博佢哋今場鬥攻鬥贏，旗開「大」勝啦！