布力般群星攻「城」
2012/08/22文:洪心Dee

 
今晚英冠有布力般流浪主場對侯城，兩隊都係升班熱門，但論人腳始終係坐擁梅菲、紐奴高美斯等球星嘅布力般佔優！加上主隊教頭堅恩收到「炒魷警告」，今場實做番齣好戲，捧1.8倍主勝啦！

侯城冇態靠唔住
布力般老闆派嚟嘅顧問早排向球迷「爆響口」，話領隊堅恩輸多3場就即刻炒魷，就算佢隨後「補鑊」話只係自己意見，但堅恩都肯定打醒十二分精神啦！好彩佢哋降班後留住原有班底，再收購埋球星梅菲、紐奴高美斯同前紐卡素射手貝斯，雖然首戰作客葉士域治唔好彩輸烏龍球被逼和，但今晚返主場應可延續上場控制戰局嘅氣勢，靠質素取勝。

反觀侯城首戰對白禮頓嘅表現認真麻麻，即使喺主場都未能佔優，要到賽事末段先以一球險勝，連領隊布魯士都話隊波仲需要多幾場比賽嚟「熱身」喎！狀態唔足仲要作客布力般，想唔輸都難啦！