紅軍挽面子 派副選都夠「赫」
2012/08/23文:亨格比利
今晚歐霸盃之夜激戰連場，其中英超利物浦會去到蘇格蘭愛丁堡造訪赫斯，「紅軍」啱啱喺英超開鑼戰輸鑊勁，肯定想搵赫斯祭旗出番啖氣，就算領隊羅渣士派副選落場，戰鬥力都高對手幾班，呢場歐霸盃附加賽首回合一於捧2.05倍「讓客」。

赫斯隊長打柴
歐霸盃賽程密、獎金少，畀着亨格比利係英超領隊，疊埋心水搏聯賽仲明智。羅渣士都係咁話，賽前盛傳佢老人家會派一班副選兵出擊，話就話副選，但加歷查、查理阿當、舒維爾同安祖卡路爾呢班球員去季夾慣夾熟，默契同戰鬥力都有番咁上下。

況且利物浦新季英超出閘脫腳，喺丹尼爾艾格被逐下淨吞西布朗3蛋，羅渣士為挽面子點都會叫班兄弟交足貨，做番齣好戲啦！主隊赫斯近兩場蘇超都失分，上仗對住晨早打少個嘅恩華尼斯亦遭逼和，加上隊長沙利奧卡斯因傷上陣成疑，橫睇掂睇都唔係利物浦對手，輸少球都要還神。

歐霸盃賽制
今輪為附加賽首回合，將進行主客兩回合淘汰賽。若兩回合總比數賽和，以作客入球較多一方為勝，若作客入球數字相同，則在次回合90分鐘後加時30分鐘，若雙方在加時期間取得相同數量的入球，由作客球隊獲勝；若加時沒有入球，則互射12碼分勝負。