三大新兵弗到漏 拜仁大炒「格」
2012/08/25文:力奇

 
連續兩季四大皆空嘅拜仁慕尼黑，今季勇挫多蒙特贏得德超盃冠軍，總算有個好開始。今晚佢哋德甲新季第一擊作客同樣位處巴伐利亞嘅新升班球隊格雷特霍夫，以拜仁開季強勢，加上三大新兵都已經齊齊開齋，火力勁爆，應該唔難大勝一場開出1.95倍「讓球客勝」。

老牌德國班霸拜仁連續兩季冇盃捧，絕對係奇恥大辱，如果今季再衰，相信唔只教練炒魷，管理層都隨時要大執位。班波上下都輸唔起，今個暑假自然繼續擴軍，上屆歐聯都打得入決賽嘅強大陣容之中，再加上喺歐國盃光芒四射嘅克羅地亞柱躉中鋒文迪蘇傑，加埋「瑞士美斯」梳頓沙基利同回巢老將比沙路等，就算近排佢哋有首席射手馬里奧高美斯養傷，法國中場列貝利病咗、「小豬」舒韋恩史迪加又暫列後備，都一樣冇有怕啦！

列貝利唔踢得 小豬做後備
事實上，拜仁本身攻擊力已經冠絕德甲，配合埋呢批前線高質新兵，實力當然得到大幅提升。睇番佢哋之前德超盃，文迪蘇傑同湯馬士梅拿各入一粒，到周中踢德國盃，文迪蘇傑更加梅開二度，梳頓沙基利同比沙路亦各入一粒，家陣個個都腳風順，信心足，自然要入幾多有幾多。

格雷首次戰德甲
格雷特霍夫方面，球會史上首次躋身德甲，仲要開咧戰就撞正拜仁，球員唔腳軟都已經偷笑啦！仲想話爆冷搶分？佢哋周中喺德國盃輸畀低組別球隊出局，證明狀態麻麻，雖然中場泰拿拉死口話唔驚拜仁，仲拍心口自己班波會踢得好過响盃賽嗰陣，一樣畀唔到人信心。最慘係呢支升班新丁仲有中場羅拔薛爾拿、前鋒菲歷斯卡拉奧斯同安烏保因傷休戰，陣容不整，主場出擊都係等炒啦！

拜仁對賽48年未輸過
‧拜仁近8場作客全勝

‧格雷特霍夫對上一次擊敗拜仁，要數到1964年。

‧兩軍主客近10場比賽，合共竟有13場開大。

1.57倍大抵玩
格雷特霍夫上季火力強勁，喺乙組經常大炒對手，今仗雖面對去季聯賽亞軍，不過拜仁後防一向都唔穩陣，隨時偷到雞入波。拜仁方面雖有射手高美斯倦勤，不過新加盟的前鋒文迪蘇傑連續兩場有波入，而且上場德國盃大炒乙組球隊雷根斯堡4蛋，今場要數呢支升班球隊，相信一樣無問題。加上兩軍主客近10場比賽，合共竟有13場開大，今晚一於再博1.57倍入球大！