曼城捧唔過 「渣」兵救紅軍
2012/08/26文:阿占

英超開鑼第二輪已經有大戰上演，所以有線電視今晚特別送上3D直播，而且呢場只係頭炮，未來半季仲有9場3D直播緊接喺hd204台上演！講番今晚場波，利物浦上場雖然輸得好肉酸，但喺未失波同踢少個前其實表現唔差，相反曼城上周險勝修咸頓，睇得出後防有問題，加上阿古路受傷缺陣，作客晏菲路唔係表面睇咁樂觀，平手盤捧紅軍！

丹尼爾艾格坐波監
利物浦開鑼戰慘吞西布朗3蛋，食紅牌嘅丹尼爾艾格今場坐波監，好在另一中堅拍檔史卡迪爾日前續約振奮軍心。無可否認紅軍防守係唔穩陣，但條鋒線仍然畀到球迷唔少期望，蘇亞雷斯一個扭幾個嘅能力唔使懷疑，只要同新拍檔波連尼夾得好，會係一對唔錯嘅攻擊組合，仲有安祖卡路爾要博表現爭正選，只要佢哋踢番出上仗頭半個鐘嘅水準，加埋晏菲路主場威力，要搶分都唔係天方夜譚。

曼城由社區盾反勝車路士到上場反勝修咸頓，大家睇到佢哋嘅鋒力有幾強大，不過2場波都失咗2球，證明條防線的確有漏洞，阿占最唔明就係領隊文仙尼點解仲一直要搵前鋒，而唔買個一級守衞返嚟幫手！

曼城連續2場失2粒
況且佢哋嘅阿根廷王牌射手阿古路上場勇戰重傷，對曼城作客打反擊戰嘅能力必有影響，今場曼城後防有隱憂，前線火力又被削弱，作客失分一啲都唔奇！

頂占筍盤：利物浦

兩隊近季交手不分高下
‧兩軍近3季對賽踢成2勝4和2負平手成績。

‧利物浦最近6次主場迎戰曼城1場不敗，取得2勝4和佳績。

‧利物浦4場主場打和賽事，分別開出2次「1:1」同「2:2」

波膽。

信往績博1:1、2:2波膽
如果要幫曼城呢支千萬雄師喺英超搵一個剋星，呢隊波非利物浦莫屬。事關曼城最近6次作客晏飛路1場不勝，只得4和2負。當中4次打和各開出2次「1:1」同「2:2」波膽。既然紅軍今晚有後防支柱丹尼爾艾加坐波監，曼城亦有王牌射手阿古路倦勤，兼中場巴利唔出得，今晚不妨冷敲兩軍打和博「1:1」同「2:2」波膽。