星期五晚大家收工唔單止有德甲睇，我哋球彩台會開始直播埋德國乙組聯賽。今晚打頭陣有科隆主場迎戰科特布斯，科隆今季降落乙組後開季唔順，好在爛船都有三斤釘，新加盟嘅射手湯馬士布卡亦交足貨，對住有科特迪瓦射手辛洛高狀態大勇嘅科特布斯，絕對有機會開1.9倍入球大！

科隆近年靠普多斯基單天保至尊，可惜呢位射手已離隊，球隊亦降落乙組，今夏人腳變動唔少，雖然失去主力，但陣中仲有唔少好球員，例如香港球迷較熟悉嘅北韓國腳鄭大世，同由杜塞爾多夫加盟嘅湯馬士布卡，科隆依家連埋盃賽入咗3球，3球都係湯馬士布卡包辦，相信新人夾熟後，科隆可重返正軌。

講到搶鏡新兵，科特布斯前鋒辛洛高就更加犀利，呢位非洲射手聯賽入咗3粒，曾經踢過雲達不來梅同漢堡等大會，落到「德乙」擺明超班；由多蒙特簽入嘅「90後」射手史迪派文亦喺上場開齋，火力得人驚，今場作客照同科隆駁火，一於博入球大！

睇完德乙直播，之後有場德甲緬恩斯對格雷特霍夫，又可以用手機去Joemud或者上www.i-cable.com同時睇「歐洲超級盃」車路士對馬德里體育會，講到場超級盃，小弟都係信入球大，話晒車仔同馬體會防守麻麻但火力強，好大機會鬥攻！