鹿島冇中堅日聯盃難衞冕 撐柏雷素爾
2012/09/05文:走肖

赤字增加已經慘，鹿島鹿角今晚喺日聯盃4強首回合主場對柏雷素爾，仲要鬧中堅荒，呢場鹿角想唔失波都幾難，平手捧柏雷素爾好過。

上季鹿島喺聯賽得第6名失落亞冠盃參賽資格，但作為日職最成功教頭嘅奧利華拉，離隊前都拎到個日聯盃光榮告別，至於今季接手領軍嘅佐真奴，季初鹿島經歷災難性低潮，佢保得住個飯碗已算好彩，依家聯賽排第12位，相信下季佢都唔好意思教落去。

柏市雙主力刑滿復出
更慘嘅係，上年東日本大地震，鹿角主場被嚴重破壞，連帶主場入座人數平均每場下跌4,800人，全季出現2.2億日圓赤字，意味鹿島下季可能要再裁員，更何況山村和也、岩政大樹同中田浩二唔踢得，鹿島搵邊個中堅抵擋對方強攻？

柏雷素爾上季一升班就奇迹稱霸日職，雖然近4場聯賽得2和2負，兼且連續3場冇波入，但至少有中場佐治韋拿同後衞近藤直也刑滿復出，近4次對賽又取得2勝2和，呢場趁住鹿角後防陣容不整，絕對係入波好時機，打底迎接下月次回合賽事。

日聯盃賽制
採主客兩回合淘汰制，今輪為4強首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時沒有入球，則需互射12碼決勝。

上一則 : 投拄備忘