C朗發火葡萄牙怒劏魚腩
2012/09/07文:走肖
2014世盃外圍賽歐洲區大戰今晚勁爆開打，盧森堡喺F組主場對葡萄牙，睇怕又會輸到冇得剩，因為盧森堡仲未洗脫魚腩味，近5次對賽又全部輸晒，對家葡萄牙嘅主力C朗拿度、拿尼同魯爾梅利斯近期嬲到出火，恰慣對手唔發威等幾時，今仗「-2」照撐1.78倍「讓客」！

盧森堡對賽至少失3粒
C朗公開喺皇馬「唔開心」後，最新消息話佢主要唔係為錢，而係每次需要人撐，皇馬高層同球迷完全冇表示，覺得自己得唔到應有尊重，呢個時候，盧森堡送到上門仲唔開殺戒？再講，拿尼開季前幾乎被曼聯賣走，魯爾梅利斯被賣豬仔去費倫巴治，成班主力滿腔怒火，落到場肯定殺人咁款。

正因為咁，比錫達斯中鋒曉高艾美達因傷缺陣根本係小事，何況佢唔係教頭保羅賓度心目中嘅正選單箭頭，對住盧森堡咁嘅對手，唔踢得可以話零影響。再講，盧森堡近5次對賽全敗，失22球連1球都冇入過，期間每場至少淨輸3球，遇見葡萄牙仲慘過見鬼，再被炒起絕對唔係奇事。